चाहिएका बेला जहाँबाट पनि झिक्न सकिने भएपछि बैंकका ग्राहकको आकर्षण एटिएमतर्फ बढेको छ । सहरबाट बिनाझन्झट रकम निकाल्न सकिने भएपछि ग्राहकले चेकभन्दा बढी एटिएमलाई रुचाएका हुन् ।
सन्धिखर्कमा पहिलोपटक एटिएम सेवा सुरु गरेको आइएमई फाइनान्सिएलका प्रायः सबै ग्राहकले एटिएम कार्ड प्रयोग गरेका छन् ।
'एटिएम कार्ड प्रयोग गर्ने ग्राहक ९० प्रतिशत छन्,' बैंकका प्रबन्धक प्रदीप पन्थीले भने, 'सजिलो भएकाले धेरैको रुचि बढेको हो ।'
निजी क्षेत्रबाट स्थापित बैंकले एटिएम सेवा दिएपछि ग्राहक बढी आकषिर्त भएका छन् । दैनिक ५ देखि १० ग्राहकले एटिएम कार्ड लिने गरेका पन्थीले जानकारी दिए । मेगा र बैंक अफ काठमाडौं बैंकका पनि ३ हजारजति ग्राहकले एटिएम प्रयोग गर्छन् । सुरक्षित र सजिलो भएकाले ग्राहकहरूको आकर्षण एटिएम सेवाप्रति रहेको बैंक अफ काठमाडौंका शाखा प्रबन्धक मदन गौतमले बताए ।
जोखिम मोलेर रकम लिएर हिँड्न नपर्ने र कार्ड भएपछि जुन ठाउँबाट पनि रकम निकाल्न सजिलो हुने भएकाले ग्राहक बढेको उनले बताए ।
