पाल्पा हुदै अर्घाखाँची जाने सडकको एक दृश्य

पाल्पा हुदै अर्घाखाँची जाने सडकको एक दृश्य   

 

                                                

रुपन्देहीको सालझण्डीस्थित फायरलाइनमा सवारी दुर्घटना

रुपन्देहीको सालझण्डीस्थित फायरलाइनमा भएको सवारी दुर्घटनामा २० यात्रु घाइते भएका छन् ।

कपिलवस्तुको कृष्णनगरबाट काठमाडौं जाँदै गरेको लु १ ख ४०५२ नम्मरको बस बिहान ८ बजे पल्टीदा ५ गम्भीरसहित २० यात्रु घाइते भएका हुन् ।

घाइतेमध्ये धेरैजसो कपिलवस्तुको वाणगंगाबाट जल लिएर पर्रोहा बोलबम धाममा आउँदै गरेका भक्तजन रहेको पश्चिम क्षेत्रिय ट्राफिक प्रहरी कार्यालय बुटवलले जनाएको छ । घाइते सबैको बुटवलस्थित लुम्बिनी अञ्चल अस्पतालमा उपचार भइरहेको छ ।

बुटवलका एक कांग्रेस कार्यकर्ता शसस्त्र समुहको जिल्ला ईञ्चार्ज

नेपाली कांग्रेसको भ्रातृ संगठन नेपाल मुस्लिम संघ रुपन्देहीका सचिव बरकत अलि भूमिगत सशस्त्र संगठन खोलेर चन्दा असुलीमा सक्रिय रहेको प्रहरीले जनाएको छ। तराई मधेश जनमुक्ति मोर्चा गोइत समूहको जिल्ला कमाण्डर बताएर अलिले रुपन्देहीका उद्योगी व्यवसायीबाट लाखौं रुपैंया चन्दा असुली गरेको प्रमाण प्रहरीले फेला पारेको छ। मोर्चाको जिल्ला कमाण्डर यमराज सिंहका नामले अलि चिनिएका थिए। उनी खुला रुपमा कांग्रेसको जातीय संगठनमा क्रियाशिल छन्। अलि रुपन्देही इञ्चार्ज रहेको तराई मधेश जनमुक्ति मोर्चा गोइत अन्यत्र अस्तित्वमा नरहेको प्रहरी श्रोतको भनाई छ।

तीन साताअघि अनुसन्धानको सिलसिलामा पक्राउ परेका अलिलाई छुटाउन कांग्रेस केन्द्रीय सदस्य एंव पूर्वमन्त्री बालकृष्ण खाण र पूर्व राज्यमन्त्री भरत शाहले रुपन्देहीका प्रहरी अधिकृतलाई टेलिफोनबाट र भेटेर नै छोड्न दवाव दिएका थिए। नेपाली कांग्रेस रुपन्देहीले विज्ञप्ति निकालेर नै अलीलाई पक्राउ गरेको प्रति विरोध जनाएको थियो। उसले अलीलाई रिहा नगरे आन्दोलन गर्ने चेतावनी दिएको थियो।

अलिसँगै प्रहरीले सो समूहको सहायक जिल्ला ईञ्चाज धकधई गाविस-२ लक्ष्मीनगरका २८ वर्षीय विजय सिंह भनिने विष्णु चौधरी, सैन्य कमाण्डर रवि सिंह भनिने २९ वर्षीय रविन्द्र चौधरी, क्षेत्र नम्वर २ का इञ्चार्ज प्रदीप प्रजापति भनिने प्रभु नारायण कोहार र सदस्य फरेना गाविस-३ बिजगौलीका २४ वर्षीय श्यामदेव गुप्तालाई पक्राउ गरी आवश्यक कारवाही अघि बढाएको छ।

रुपन्देही जिल्ला प्रहरी कार्यालयका अनुसार, पक्राउ परेका विष्णुको साथबाट एक थान कटुवा पेस्तोल र ६ राउण्ड गोली, प्रभुनारायणको घरबाट तराई मधेश जनमुक्ति मोर्चा गोइत लेखेको एक सय ७१ थान रसिद लगायतका कागजपत्र प्रहरीले बरामद गरेको छ। उनीहरुले सर्बसाधारणबाट उठाएको चन्दाबारेमा अनुसन्धान र बयान भइरहेको रुपन्देही जिल्ला प्रहरी कार्यालयका एसपी रविन्द्रनाथ रेग्मीले नागरिकलाई बताए। उनीहरुले चन्दा नदिए मार्ने धम्की दिएको पत्र यहाका उद्योगी व्यवसायीलाई पठाएका पत्रहरु समेत प्रहरीले संकलन गरेको छ।

मोर्चाका जिल्ला ईञ्चार्ज अलि बैशाखमा झण्डै नौ महिना लामो जेल जीवन बिताएर छुटेका थिए। अलीले फेरि पुरानै क्रियाकलापमा सक्रिय भएको सूचनाका आधारमा अनुसन्धानका लागि प्रहरीले असार २० गते पक्राउ गरेको थियो। कांग्रेस रुपन्देहीका सभापति अब्दुल रज्जाकले अलि निर्दोष रहेको र प्रहरीले अनाहकमा फसाउन खोजेको दावी गरे।

हतियार कारोवारको अभियोगमा गत बर्षको साउन ५ गते पक्राउ परेका अली गत बैशाख २ गते ७५ हजार जरिवानामा छुटेका थिए। गत बर्ष भारतीय नागरिक ओमप्रकाश पासवान र राहुलप्रताप सिंहबाट अलीले ९ एमएनको इटालियन पेस्तोल भारतीय २१ ह्जार रुपैंयामा खरिद गरेको अवस्थामा प्रहरीले पक्राउ गरेको थियो। भारतबाट हतियार खरिद गरेर यहा ल्याउने र बेच्ने धन्दामा लागेका अली पछिल्लो पल्ट सशस्त्र समूहको नाममा चन्दा असुली र धम्कीमा लागेको पाइएको प्रहरीको भनाई छ।

हतियारको कारोवार अघि उनी गाडी चोरी तस्करीमा संलग्न रहेका थिए। गाडी मोटरसाइकलको नक्कली ब्यूबुकसहित पक्राउ अलि दुई बर्ष अघि रुपन्देही जिल्ला अदातलमा परेको मुद्धामा अदालतले सामान्य धरौटीमा थुनामुक्त गर्ने आदेश दिएको थियो।

रिडीमा देवदत्त ऋशीको मुर्ती बनेको बर्षौ पछि अब बल्ल देवदत्त पार्क बन्ने

रिडीमा  देवदत्त ऋशीको मुर्ती बनेको बर्षौ पछि अब बल्ल   देवदत्त पार्क बन्ने भएको छ्। रुरु रेशुङा संरक्षण तथा पर्यतन बिकास समितीमा भएको राजनैतिक खिचातानीका कारण अलपत्र बनेको  देवदत्त ऋशीको मुर्ती र   देवदत्त पार्कको निर्माण कार्य सुरु भएको छ्। करिब दशलाख रुपैयाको लागतमा देव्दत्त ऋशीको मुर्ती नजिक पुग्नको लागि श्रेणी,बारहरु तथा मर्मतसंभार कार्य हुँदैछ् भने,आउदो बर्ष करीब २१लाख रुपैयाको लागतमा देव्दत्त पार्कका अन्य हिस्साको निर्माण कार्य गरिने भएको छ्।

 

तीन दिनअघि प्यूठानको बरौलामा भेटिएको बम निश्क्रिय पार्न अझै स्विकृति गरिएको छैन

तीन दिनअघि प्यूठानको बरौलामा भेटिएको बम अझै निश्क्रिय पारिएको छैन । बरौला ७ मलवाङमा शुक्रवार दिउँसो फेला परेको सकेट बम निश्क्रिय पार्नको लागि नेपाली सेना डिस्पोजल विभागबाट स्विकृति नआएकाले निश्क्रिय गरिएको छैन ।

बम स्थानीय अमर बहादुर सार्कीले खेतमा काम गर्दै गर्दा फेला पारेका थिए । आइतवार स्वट्ठकृत आएमा बम निश्क्रिय गरिने चण्डीदल गण प्यूठानले जनाएको छ । बमलाई प्रहरीको निगरानीमा राखिएको बरौला प्रहरी चौकीका इन्चार्ज मोहन वलीले बताए । द्धन्द्धकालमा तत्कालीन बिद्रोही माओवादी ओहोरदोहोर गर्ने क्रममा खसेको हुनसक्ने प्रहरीको आंशका छ ।

लुम्बिनी परिकल्पना बुनिएको 'एसिया प्यासिफिक एक्स्चेन्ज एन्ड कोअपरेसन फाउन्डेसन' मा को-को छन् त

लुम्बिनीलाई 'मुस्लिमको मक्का' र 'क्रिस्चियनको भेटिकनसिटी'जस्तै बनाउने परिकल्पना बुनिएको तीन अर्ब अमेरिकी डलर सहयोग घोषणा गर्ने चिनियाँ संस्था 'एसिया प्यासिफिक एक्स्चेन्ज एन्ड कोअपरेसन फाउन्डेसन' का ९ सहअध्यक्षमध्ये माओवादी अध्यक्ष पुष्पकमल दाहाल र पूर्वयुवराज पारस शाहसहित आठ जना गैरचिनियाँ छन् ।

कार्यकारी उपाध्यक्ष एक जना मात्र चिनियाँ व्यक्ति हुन् । सहअध्यक्षहरू प्रायःजसो धनाढ्य छन् भने पाँच जना व्यवसायी हुन् । व्यवसायीमध्ये तीन जना अमेरिकी, एक बेलायती र एक मलेसियाली छन् । नेपाल र थाइल्यान्डका एक-एक राजनीतिज्ञ छन् । बाँकी दुईमध्ये कूटनीतिज्ञ र पूर्वयूवराज हुन् । को-को छन् त संस्थामा ?

१. पुष्पकमल दाहाल

फाउन्डेसनले आफ्नो वेबसाइटमा आफ्नो संस्थाका सहअध्यक्ष पुष्पकमल दाहाललाई नेपालमा क्रान्तिकारी परिवर्तन ल्याउने ठूलो पार्टी एकीकृत माओवादीका अध्यक्ष भनेर चिनाएको छ । दाहाललाई विदेश भ्रमण चीनबाट सुरु गर्ने पहिलो नेपाली प्रधानमन्त्रीका रूपमा समेत उल्लेख गरिएको छ । यसअघिका नेपाली प्रधानमन्त्रीले पहिले भारत भ्रमण गर्ने परम्परा दाहालबाट तोडिएको समेत उल्लेख छ ।

२. पारस शाह

फाउन्डेसनका अर्का सहअध्यक्ष पारस शाहलाई भने नेपालका युवराजकै रूपमा चिनाइएको छ ।

ज्ञानेन्द्र शाहलाई पूर्वराजा

भनिए पनि नेपालको संविधानअनुसार पारस राष्ट्रप्रमुख हुने लेखिएको छ ।

३. जिआओ उनान

स्नातकोत्तरसम्म अध्ययन गरेका ४७ वषर्ीय जिआओ उनान हालसम्म पदमा देखिएका एकमात्र चिनियाँ हुन् । बेइजिङमा जन्मिएका उनान चीनको उत्तरपूर्वी हेलोजियान प्रान्तको राजधानी हारविनका बासिन्दा हुन् । चिनियाँ कम्युनिस्ट पार्टीका सदस्य उनी चीनको राष्ट्रिय विकास तथा सुधार आयोगमा पश्चिम क्षेत्रीय उपनिर्देशक छन् । विश्व बौद्ध शान्ति प्रतिष्ठान र चीनको सामाजिक, आर्थिक तथा सांस्कृतिक आदानप्रदान समितिका समेत उनी उपाध्यक्ष हुन् । राष्ट्रसंघअन्तर्गत औद्योगिक विकास संगठन र विभिन्न चिनियाँ बैंकमा काम गरेको उनको अनुभव छ । अक्सफोर्ड आर्थिक अनुसन्धानमा वरिष्ठ सल्लाहकार, युनिभर्सिटी अफ हाइफा इजरायलका कार्यकारी निर्देशकलगायत उनी संलग्न संघसंस्थाको फेहरिस्त लामै छ ।

४. लियोन चार्नी

७३ वषर्ीय चार्नी अमेरिकी रियल स्टेटका टाइकुन हुन् । १ अर्ब ३० करोड डलरका मालिक उनलाई फोब्र्स म्यागजिनले अमेरिकी धनाढ्यको सूचीमा ३०८ औं नम्बरमा राखेको छ । पूर्वअमेरिकी राष्ट्रपति जिमी कार्टरका सल्लाहकार उनलाई पर्दा पछाडिका चतुर खेलाडी मानिन्छ । सन् १९७८ मा इजिप्ट र इजरायलबीच अमेरिकामा भएको पहिलो क्याम्प डेभिड शान्ति सम्झौता गराउन चार्नीले महत्त्वपूर्ण भूमिका निर्वाह गरेको बताइन्छ । यसबाहेक टेलिभिजन कार्यक्रम प्रस्तोता, राजनीतिक विश्लेषक, लेखक, सामाजिक कार्यकर्ता र यहुदी नेताका रूपमा समेत उनी उत्तिकै चिनिन्छन् ।

५.ज्याक रोजेन

ज्याक रोजेन अमेरिकी जुइस कंाग्रेसका अध्यक्ष हुन् । ५८ वषर्ीय उनलाई एक दैनिक पत्रिकाले अमेरिकाको उत्कृष्ट पाँच प्रभावशाली यहुदीमा सूचीकृत गरेको छ । दूरसञ्चार, स्वास्थ्य, सौन्दर्य प्रसाधनलगायत व्यवसायमा संलग्न उनी थुप्रैै बहुराष्ट्रिय कम्पनीमा अध्यक्ष छन् । संसारकै प्रमुख राजनीतिज्ञसँग उनको निकट सम्बन्ध रहेको फाउन्डेसनको वेबसाइटमा उल्लेख छ । रोजेनले थुप्रै पटक चीन भ्रमण गरेका छन् ।

६. टियोन हिउ किङ

७५ वर्षीय किङ मलेसियामा चिनियाँ मूलका धनाढ्य उद्यमीमा पर्छन् । एक अर्ब बीस करोड अमेरिकी डलरका मालिक उनलाई फोब्र्स म्यागजिनले मलेसियाका ४० धनाढ्यको सूचीमा १० औं नम्बरमा राखेको छ । काठ, तेल र सञ्चारक्षेत्रमा उनको लगानी छ । रिन्बुनान हाइजु ग्रुपका कार्यकारी अध्यक्ष उनको व्यवसाय हङकङ, चीन, सिंगापुर, अस्ट्रेलिया, क्यानडा, बेलायतलगायत मुलुकमा समेत फैलिएको छ । फाउन्डेसनले चिनियाँ राष्ट्रपति तथा प्रधानमन्त्रीलगायत नेताहरूसँग उनको राम्रो सम्बन्ध रहेको जनाएको छ ।

७. स्टिभन क्लार्क राकफेलर

४१ औं पूर्वअमेरिकी उपराष्ट्रपति नेल्सन राकफेलरका नाति हुन् स्टिभन । स्नातकोत्तरसम्म अध्ययन गरेका उनी अमेरिकास्थित पार्क एभेन्यु बैंकका निर्देशक हुन् । माइक्रोक्रेडिट बैंकिङका ज्ञाता उनलाई गरिबी उन्मूलन गर्न विशेष योगदान गरेबापत राष्ट्रसंघद्वारा फुल ब्राइट अवार्डले पुरस्कृत गरिएको थियो । सामाजिक संस्था ग्रामीण फाउन्डेसनका समेत उनी निर्देशक छन् ।

८. डा. राम्जी सन्बार

राम्जी सन्बार लन्डनस्थित सन्बार विकास निगम 'एसडीसी ग्रुप' का संस्थापक अध्यक्ष हुन् । ऊर्जा, निर्माण, सूचना प्रविधिलगायत क्षेत्रमा कार्यरत उक्त कम्पनी अमेरिका, युरोप तथा मध्य र सुदूरपूर्वमा समेत अग्रणी मानिन्छ । बेरुतको अमेरिकन विश्वविद्यालयबाट स्नातक उनलाई पेरिस विश्वविद्यालयले पर्यावरणसम्बन्धी मुद्दामा काम गरेबापत विद्यावरिधिको उपाधि दिएको हो ।

९. कोलिन हेसल्टिन

अस्टे्रलियाका वरिष्ठ कूटनीतिज्ञका श्रेणीमा पर्छन् हेसल्टिन । हाल नाटिलस इन्स्िटच्युटमा वरिष्ठ सहायक पदमा कार्यरत उनी सन् १९८२ देखि १९८५ र १९८८ देखि १९९२ सम्म बेइजिङस्थित अस्ट्रेलियाली दूतावासका मिसन उपप्रमुख थिए । सन् २००६ मा उनलाई सरकारले एसिया प्रशान्त आर्थिक सहयोग -एपेक) को कार्यकारी प्रमुखका रूपमा सिंगापुर नियुक्त गरेको थियो । सन् २००१ देखि २००५ मा उनी कोरियाका राजदूत

थिए । चिली र स्पेनमा समेत उनको कूटनीतिक नियुक्ति भएको थियो । तीस वर्षभन्दा अधिक समय यिनले विदेश मामला विभागअन्तर्गत एसिया प्रशान्त क्षेत्रमा रहेर काम गरेका छन् । यस क्षेत्रका निजी र सार्वजनिक संगठनका व्यापारिक तथा राजनीतिक रणनीति बनाउने मामलामा उनी विज्ञ मानिन्छन् ।

१०. कोर्न डबरान्सी

थाइल्यान्डका पूर्वउपप्रधानमन्त्री डबरान्सी अक्टोबर २००२ देखि नोभेम्बर २००३ सम्म उक्त पदमा थिए । सन् १९७४ मा राजनीति सुरु गरेका उनी १९८६ मा पहिलोपटक उद्योग मन्त्रालयका उपमन्त्री बनेका हुन् । त्यसपछि विभिन्न समयमा पर्यटन,

ऊर्जा, खेलकुद, स्वास्थ्य मन्त्री हुँदै उनी उपप्रधानमन्त्रीसम्म बने । हाल थाइल्यान्ड चीन मैत्री संघमा उनी अध्यक्ष छन् । कुशल राजनीतिज्ञ र सामाजिक कार्यकर्ताको छवि बनाएका उनले दक्षिणपूर्वी एसियामा शान्ति र स्थायित्वका लागि लामो समय सक्रिय रहेर महत्त्वपूर्ण योगदान पुर्‍याएको बताइन्छ

साउने औंशीको अवशरमा रेसुङ्गा पोखरीमा नुहाउन जाने श्रद्धालुहरुको भिड

साउने औंशीको अवशरमा शनिबार गुल्मी जिल्लाको धार्मिक क्षेत्र रेसुङ्गा पोखरीमा नुहाउन जाने श्रद्धालुहरुको दिनभर भिड लागेको थियो । रेसुङ्गा पोखरीको पानीले नुहाएपछि श्रद्धालुहरु लाई चारधाम जान नपर्ने र आफुले अन्जानमा गरेका संम्पुर्ण पापहरु पनि नष्ट हुने तथा संवृद्धी प्राप्त हुने धार्मिक विश्वासका कारण साउने औंशिका दिन रेसुङ्गा पोखरीमा नुहाउन जाने श्रद्धालुहरुको घँुईचो लाग्ने गर्दछ ।

साउनभर रेसुङ्गा पोखरीमा नुहाउन र यज्ञशालामा पुजाआजा गर्नका लागि गुल्मी लगायत वाग्लुङ्ग, अर्घाखाँची, प्यूठान, पाल्पा, स्याङ्गजा लगाएतका ठाउँहरुवाट श्रृद्धालु जाने गर्दछन् । त्यसमा पनि विशेष गरि साउने औंशीका दिन वढीमात्रमा पोखरीमा नुहाउन जाने मानिसहरुको चाँप वढ्दै जान थालेको रेसुङ्गा संरक्षण समितिका उपाध्यक्ष युवराज भण्डारीले वताउनुभयो ।

विगत वर्षको तुलनामा यसपटकको साउने औंशिमा रेसुङ्गा पोखरीमा नुहाउन अघिल्लो वेलुकीदेखि नै श्रद्धालु भक्तजनहरु रेसुङ्गामा गएर वास वसेका थिए । साउने औंशीको दिन रेसुङ्गा पोखरीमा धेरै जसो मानिसहरु धार्मिक मान्यताका कारण जाने गरेपनि कतिपय युवायुवतीहरु भने यसदिन आफ्ना साथीहरुसँग रमाईलो मनाउन र भेटघाट गर्नका लागि पनि जाने गर्दछन् । रेसुङ्गा संरक्षण समितिले यस क्षेत्रमा मासु र

मदिरा जन्य पदार्थहरु विक्रि वितरणमा रोक लगाएका कारण गत वर्ष भन्दा योपटक पोखरीमा लाग्ने मेला पनि निकै व्यवस्थित वनेको छ । संरक्षण समितिले आज त्यस क्षेत्रमा आयोजना गरेको प्रवचन तथा भजन किर्तनमा मानिसहरु निकै उत्साह पूर्ण सहभागिता रहेको थियो ।

यज्ञशाला मन्दिरमा साउन अवधिभर पुराण वाचन, पाठ पारायण, भजन किर्तन, होम, श्राद्ध आदि विशेष धार्मिक कार्यक्रमहरु समेत हुने गर्दछ । प्राकृतिक तथा जैविक विविधताले समेत परिचित यस क्षेत्रमवाट हिमाली क्षेत्रका हिमश्रृखलाहरुको प्रत्यक्ष अवलोकन गर्न सकिने हुनाले पछिल्लो समयमा यस क्षेत्रमा भ्रमण गर्न आउने आन्तरीक तथा वाह्य प्रर्यटकहरुको संख्यामा समेत वृद्धि भएको छ । त्यस्तैगरि

आज गुल्मीको धार्मिक क्षेत्र रुरु र रुद्रवेणीधाममा पनि श्रद्धालुहरुको घुँईचो लागेको थियो ।