लुम्विनी मेडिकल कलेज एण्ड रिसर्च सेन्टर प्रभासमा दुई किलोको हाईडाटिड सिष्टको सफल अप्रेसन

कलेजोमा जोडिएर रहेको दुई किलोको हाईडाटिड सिष्टको लुम्विनी मेडिकल कलेज एण्ड रिसर्च सेन्टर प्रभासमा अप्रेसन सफल भएको छ । ल्याप्रोटोमी प्रविधिबाट गरिएको अप्रेसन सफल भएपछि चिकित्सकहरु खुसी भएका छन् ।

गुल्मीको बुढीचौर घर भएका ११ वर्षीय सन्तोष सुनारीको कलेजोबाट मंगलवार शल्यक्रिया गरेर सिस्ट निकालिएको हो । प्राध्यापक डा. वाईजी ताम्बे, डा. प्रकाश सापकोटा र डा. प्रदिप तिमिल्सेना लगायत चिकित्सकको टोलीले शल्यक्रिया गरेका हुन् । ल्याप्रोटोमी प्रविधिबाट पहिलो पटक यति ठूलो सिस्टको सफल अप्रेसन गरिएको हो ।

सुनारीको कलेजोमा दुई किलो एकसय ग्रामको सिस्ट रहेको थियो । बरिष्ठ सर्जन डा. प्रकाश सापकोटाका अनुसार डेढ लिटर पानीले भरिएको अवस्मा रहेको सिस्टलाई सफलतापुर्वक शल्यक्रिया गरिएको छ । सामान्य मासु पलाउने र पानी जम्ने भएपनि यति ठुलो कमै हुने उनले बताए । शल्यक्रिया पश्चात् सुनारीको स्वास्थ्य अवस्था सामान्य रहेको छ ।

बुटवल योगीकुटीकी कविता थापाको शव छैटौं दिन बिहीबार दाहसंस्कार

जनजागरण महिला समूहका महिलालगायत स्थानीय महिलाको यातनापछि आत्मग्लानिका कारण आत्महत्या गरेकी भनिएकी बुटवलको योगीकुटीकी कविता थापाको शव छैटौं दिन बिहीबार दाहसंस्कार गरिएको छ ।

पीडित पक्ष, संसदीय छानबिन टोली, महिला आयोगको अध्ययन टोली, जिल्लास्तरीय सुरक्षा निकाय र राजनीतिक दलहरूबीच सबै दोषीलाई पक्राउ गरी कानुनी दायरामा ल्याउने, पीडितलाई न्यायोचित राहत उपलब्ध गराउने र सबै पक्षको सहभागितामा सम्मानजनक अन्त्येष्टि गर्ने तीन कुरामा सहमति भएपछि मृतकका परिवार शव दाहसंस्कार गर्न सहमत भएका हुन् । 'सबै पक्षबाट तिमीहरू अन्यायमा पर्दैनौ, मृत्युपछि भए पनि आमाले न्याय पाउँछिन् भन्ने भएपछि संस्कार गर्ने भएका हौं,' मृतक कविताका छोरा सविनले भने, 'कानुन मिचेर आमालाई यो गतिमा पुर्‍याउनेलाई कानुनी दायरामा ल्याएपछि मात्र आमाको आत्माले शान्ति पाउनेछ ।'

आफन्त दाहसंस्कारमा सहमत भएपछि कविताको शव करिब तीन घन्टा उनलाई यातना दिएको स्थान शिवालय परिसरमा राखिएको थियो । शव हेर्न र श्रद्धाञ्जलि दिन स्थानीय सयौंको भीड लागेको थियो । संसदीय छानबिन टोली, महिला मानव अधिकार आयोगको टोली, मानव अधिकार आयोगको टोली, प्रहरी प्रमुख, प्रशासन प्रमुख, अधिकारकर्मी, महिला अधिकारकर्मीर्लगायतको पनि सहभागिता थियो ।

उनको तिनाउ नदीस्थित मगरघाटमा दाहसंस्कार गरिएको छ । रक्सी सेवन तथा परपुरुषसँग लसपसको आरोपमा गत शनिबार स्थानीय महिला समूहका महिलाले मोसो दलेर हातखुट्टा बाँधी कुटपिट गरेको आफन्तको भनाइ थियो ।

एपेक अध्ययन टोली लुम्बिनीमा

लुम्बिनीलाई मुस्लिमको मक्का, इसाइको जेरुसेलम जस्तो पवित्र पर्यटकीय नगर बनाउने तीन अर्ब डलरको बृहद परियोजना बोकेको एशिया प्यासिफिक एक्सचेञ्ज एण्ड को अपरेशन फाउण्डेशन (एपेक) का सह अध्यक्ष कोलीन सेसेलटिन सहितको टोलीले बिहीबार बुद्ध जन्मस्थल लुम्बिनीको भ्रमण गरेको छ। भ्रमणको क्रममा सह अध्यक्ष कोलिनले लुम्बिनीलाई पवित्र तीर्थस्थलको रुपमा आधुनिक सेटेलाइट सिटीको रुपमा विकास गर्ने गरी सघाउन चाहेको बताए।

कोलीनले लुम्विनीको ऐतिहासिक संरचना, प्राचीन स्मारक र सांस्कृतिक सम्पदाको संरक्षण गरि पुरानो गुरुयोजनालाई सघाउ पुर्‍याउँदै अन्य भौतिक पूर्वाधार निर्माणको काममा सहयोग रहने जानकारी दिए।

लुम्बिनी सूचना केन्द्रमा पत्रकारहरुसँग कुराकानी गर्दै उनले पहिलो चरणमा लुम्विनीमा आधुनिक संचार सेवा पुर्‍याउने योजना सुनाए। त्यसका लागि आधुनिक मोबाईल सेवा, स्याटेलाईट फोन र अन्य आधुनिक संचारका पूर्वाधारहरुको विकास गर्ने योजनाका साथ काम हुने उनको भनाई छ।

विश्वका धेरै व्यापारिक प्रतिष्ठान, विभिन्न राष्ट्र एवं संघसंस्थाबाट सहयोग सम्बन्धि श्रोत जुटाउन लागेको पनि उनले जानकारी दिए। लुम्विनीमा अन्तराष्ट्रिय स्तरको विमानस्थल, सडक, रेल वे, सूचना प्रविधि, संचार सेवा पुर्‍याई लुम्विनीलाई अत्याधुनिक सेटेलाईट शहर बनाउने योजना रहेको एपेकका सदस्य सचिव नरेन्द्र उलकले जानकारी गराए। हेलिकोप्टरबाट आएका दुई पत्रकारसहित आठ एपेक प्रतिनिधिले लुम्विनी भ्रमण गरी काठमाण्डौ विहिवार नै फर्केको छ।

कोलिन सहितको टोलीलाई यहा लुम्विनी विकास कोषका कोषाध्यक्ष मझिलाल थारु थनेत लगायत कोषका कर्मचारीले स्वागत गरे। लुम्विनी गुरु योजनाका बारेमा कोषका सुचना अधिकृत हरि राईले जानकारी गराए।

ताईवानको प्रसिद्ध सञ्चार कम्पनी ताईतुङ कम्युनिकेशन कर्पोरेशन(टिसीसी)ले लुम्विनीमा अत्याधुनिक सञ्चार सुविधा पुर्‍याउनको लागि आवश्यक अध्ययन गर्न लुम्विनी आइपुगेको छ। टिसीसीका अध्यक्ष चिङ्ग हङ्ग लिको नेतृत्वमा मंगलबार आएको टोलीमा लि सहित पाँच सञ्चार विशेषज्ञ छन्।

एपेकले लुम्विनीमा अत्याधुनिक संचार सेवाका लागि प्रारम्भिक प्राविधिक अध्ययन सुरु गर्न खटाएको लिले जानकारी दिएका छन्। एपेकले टिसीसीलाई लुम्विनीमा अत्याधुनिक सञ्चार सुविधा सम्वन्धी अध्ययन गर्ने जिम्मा दिएको उनको भनाई छ।

टिसीसीका अध्यक्ष चिङ्ग हङ्ग लि सहितको टोलीले पाँच विशेषज्ञ सहित अत्याधुनिक संचार सेवाका लागि प्रारम्भिक प्राविधिक अध्ययन सुरु गरेको बताए पनि लुम्विनी विकास कोषले प्राविधिक अध्ययनको बिषयमा कुनै जानकारी नभएको बताएको छ।

एसएलसी पुरक परीक्षा अन्तर्गत गणित विषयको परीक्षामा अर्घाखाँचीमा ३६ विद्यार्थी निष्कासित

जारी एसएलसी पुरक परीक्षा अन्तर्गत  अनिवार्य गणित विषयको परीक्षामा अर्घाखाँचीमा   ३६ परीक्षार्थी निष्कासित भएका   छन् । यसरी निष्कासित हुनेमा  हुनेमा अर्घाखाँची  आवासीय उच्च माविबाटको केन्द्रवाट ६, जनज्योती उच्च माविबाट ११ र भगवती उच्च माविको केन्द्रवाट १९ जना परीक्षार्थीलाई परीक्षाको मर्यादा विपरित काम गरेकाले निस्कासन गरिएको जिल्ला शिक्षा अधिकारी मित्रमणी खनालले बताउनुभयो । यस अघि अग्रेजी विषयको परीक्षामा अर्घाखांचीमा ६ जना निस्कासित भएका थिए । परीक्षा हलभित्र चिट चोरेको भन्दै जिल्ला शिक्षा कार्यालयका कर्मचारीले उनीहरुको परीक्षा रद्द गरेका हुन ।

खिल्जी गाविसको एक किराना पसलमा आगलागी

अर्घाखाँचीको खिल्जी गाविसको एउटा किराना पसलमा आगलागी हुँदा एक लाख ३५ हजार वरावरको धनमाल जलेर नष्ट भएको छ । खिल्जी गाविस वार्ड नं. २ रामपुर स्थित श्यामलाल चुँदालीको किराना पसलमा आगलागी हुँदा पसलमा रहेको दैनिक उपभोग्य सामान, भाँडाकुँडा, अन्नपात, नगद तथा कागजपत्रहरु सवै जलेर नष्ट भएको प्रहरीले वताएको छ । आगलागीको कारण भने खुल्न सकेको छैन /

   

कविता थापा घटना मध्ययुगीन बर्बरता

जनजागरण महिला समुहका सदस्यहरुको यातनापछि आत्महत्या गरेकी बुटवलको योगीकुटीकी कविता थापाको घटनाबारे सत्यतथ्य अध्ययन गर्न आएको चार सदस्यीय संसदीय छानवीन टोलीले बुधबारदेखि स्थलगत अध्ययन थालेको छ ।

घटनास्थल, प्रत्यक्षदर्शी, हिरासतमा रहेका महिला तथा स्थानीय प्रहरी प्रशासनसंगको सोधपुछपछि प्रतिक्रीया दिंदै टोली संयोजक विनोद पहाडीले कवितामाथि महिला समुहले गरेको कार्य मध्ययुगीन बर्बरता तथा मानव सम्यतालाई नै चुनौति दिने खालको भएको टिप्पणी गरेका छन् ।

दवाउन खोजिएको घटनालाई बाहिर ल्याएर सञ्चार माध्यमले राज्यको आँखा खोलेको बताउँदै टोलीले अब यस्ता घटना दोहोरिन नदिन पनि घटनाको गहिरो अध्ययन गर्ने उनको भनाई थियो । स्थलगत अध्ययनमा संलग्न नैनकला थापाले घटनालाई जघन्य अपराधका रुपमा लिएर अध्ययन सुरु गरेको र त्यसअनुसार घटनाको गहिरो अनुसन्धान गरी सत्यतथ्य बाहिर ल्याउने बताए ।

टोलीले बिहीबार पनि घटनाको थप अध्ययन गर्ने र पीडित तथा प्रत्यक्षदर्शी मानवअधिकारकर्मी, पत्रकारलगायतसंग छलफल गर्ने जनाएको छ । शनिबार दिउँसो रक्सी खाने कुलतमा लागेको आरोप लगाउँदै स्थानीय जनजागरण महिला समुहका सदस्यहरुले यातना दिएपछि आत्मग्लानीका कारण कविताले त्यसराति घरमा झुण्डीएर आत्महत्या गरेकी थिइन् ।

संसदीय छानविन टोलीको अध्ययनपछि पनि मृतक पक्षधरले प्रहरीले सबै दोषी महिलालाई पक्राउ गर्नु पर्ने तथा पीडितलाई राहत उपलब्ध नगराउँदासम्म शव नउठाउने भन्दै पाँचौं दिन बुधबार पनि शव घरकै बरण्डामा राखेको छ ।

मृतकका आफन्त तथा स्थानीयले स्थलगत अध्ययनकालागि आएको संसदीय टोलीसंग घटनाको सत्यतथ्य अध्ययन गर्न तथा सबै दोषीलाई पक्राउ गरी सार्वजनिक गर्न अनुरोध गर्दै केहीबेर बाटो समेत छेकेका थिए । शव हेर्न आउने मृतकका दाजुभाइ तथा टाढा टाढाका आफन्तहरुसमेतको घरआसपासमा भीड लागेको छ ।

आक्रोशीत समुहको भीडले योगीकुटी बजार थप तनाग्रत बनेको छ । प्रहरीले घटनामा संलग्न देवु ढकाल, श्याम कुमारी गिरी, माया थापा र कमला न्यौपानेलाई पक्राउ गरी इलाका प्रहरी कार्यालय बुटवलमा राखेको छ ।

लुम्बिनीको विकासका लागि छलफल

माओवादी अध्यक्ष पुष्पकमल दाहालले लुम्बिनीको विकासका लागि आयोजना गरिएको छलफलमा भाग लिन नै आफू मलेसिया गएको स्पष्ट पारेका छन् ।

मलेसियाको चार दिन बसाइपछि बुधबार स्वदेश फर्किएका अध्यक्ष दाहालले बुधबार त्रिभूवन विमानस्थलमा सञ्चारकर्मीसित कुरा गर्दै बैठकमा लुम्बिनीको विकासका लागि अमेरिका, अष्ट्रेलिया, दक्षिण कोरियालगायतका प्रतिनिधिसित छलफल भएको बताए ।

लुम्बिनीमा तीन अर्ब अमेरिकी डलरको महत्त्वाकांक्षी परियोजना घोषणा गर्ने चिनियाँ संस्थाको आधिकारिकता विवाद उठेकाबेला दाहाल एसिया प्यासिफिक एक्सचेन्ज एण्ड कोअपरेसन फाउण्डेसन -एपीईसीएफ)को बैठकमा सहभागी हुन मलेसिया गएका थिए ।

'यसबारे विवादास्पद कुरा आएका छन्,' दाहालले भने, 'तर त्यस्तो केही होइन, यो एक्लै लुकेर गर्ने कुरा होइन, सरकारसँग सहकार्य गरेरै हुन्छ ।' उनले नेपालसहित भारत र चीनसमेत मिलेर लुम्बिनीलाई धार्मिक पर्यटकीय क्षेत्रकारुपमा विकास गरिने बताए ।

माओवादी अध्यक्ष दाहालले अबको राजनीति ५ बुँदे सहमतिअनुसार नै अघि बढ्ने बताए । प्रधानमन्त्री झलनाथ खनाललाई सन्चो भएपछि सहमति प्रयासका लागि गृहकार्य हुनेसमेत जानकारी दिए ।

दाहाल आइतबार विदेश विभाग प्रमुख कृष्णबहादुर महरासहित मलेसिया उडेका थिए ।