भौतिक योजना तथा निर्माण मन्त्री टोपबहादुर रायमाझी सवार गाडीले मोटरसाइकललाई ठक्कर

भौतिक योजना तथा निर्माणमन्त्री टोपबहादुर रायमाझी सवार बा १ झ ४२२५ नम्बरको गाडीले मोटरसाइकललाई ठक्कर दिँदा दुई घाइते भएका छन्। नारायणहिटी पश्चिमगेट नजिकै बा २२ प ९२२३ नम्बरको मोटरसाइकललाई ठक्कर दिँदा मोटरसाइकल चालक कृष्णबहादुर तामाङ र सवार मिलन आचार्य घाइते भएका हुन्। उनीहरुलाई उपचारका लागि अस्पताल भर्ना गरिएको प्रहरीले जनाएको छ। मन्त्री रायमाझी चढेको गाडीले सर्वसाधारणलाई ठक्कर दिएपछि ट्राफिकले प्रहरीले गाडी र चालक इन्द्रमणि पौडेललाई नियन्त्रणमा लिएको थियो। केही समय नियन्त्रणमा राखेर बुधबार हाजिर हुनेगरी पौडेललाई छाडिएको छ।

पर्वतमा हँसिया प्रहार गरेर दुई महिलाको हत्या

पर्वतमा एक व्यक्तिले हँसिया प्रहार गरेर दुई महिलाको हत्या गरेका छन् भने दुई महिला घाइते भएका छन्। लिमिठान-९का भक्त भण्डारीले श्रीमती मीना भण्डारी र काकी हरिकला भण्डारीको हत्या गरेको प्रहरीले जनाएको छ। हतियार प्रहारबाट भक्तकी आमा धनशरी र भाइबुहारी पवित्रा घाइते भएका छन्। घाइतेको स्थानीय स्वास्थ्य संस्थामा उपचार भइरहेको छ।मंगलबार साँझ हत्या गरेर फरार भएका भण्डारीलाई भाग्दै गरेको अवस्थामा कुर्घा-६ बाट पक्राउ गरेको प्रहरी सहायक निरीक्षक ओम घिमिरेले जानकारी दिए।

दुई दिनदेखि मदिरा सेवन गरेका भण्डारीले घरभित्रबाटै हँसिया निकालेर एक्कासी हानेको स्थानीय सोमबहादुर क्षेत्रीले बताए। भण्डारीका दुई छोरा र एक छोरी छन्।

तास खेल्दै गरेको अबस्थामा १२ जुवाडेलाई खालवाटै रङ्गेहात पक्राउ

प्रहरीले कावासोतीमा तास खेल्दै गरेको अबस्थामा १२ जुवाडेलाई खालवाटै रङ्गेहात पक्राउ गरेको छ । ईलाका प्रहरी कार्यालय कावासोतीका डिएसपी मुकुन्द मरासिनीका अनुसार शिवमन्दिर गाविस-२ स्थित लाल बहादुर पुन मगरको घरमा जुवा खेल्दै गरेका स्थानिय १२ जनालाई मंगलवार सांझ पक्राउ गरिएको हो । जुवाडेको खालवाट १५ हजार ३ सय ९७ रुपैया नगद बरामद भएको छ । पक्राउ परेका मध्ये ७० वर्ष माथिका बिरामी अबस्थाका तिन जनालाई कागज गराएर फेरी नखेल्ने सर्तमा बुधवार दिउसो छोडेको छ । अन्य ९ जना बिरुद्ध मुद्धा दायर गरेको छ ।

प्रहरीले कावासोती र आसापासको क्ष्ाेत्रमा एक सातादेखिे जुवा तास र हरेक राति १० बजेपछि जथाभावि मादक पदार्थ बिक्रि बितरणमा रोक लगाउदै आएको दावी गरेको छ ।

अपहरणमा परेका पर्वतका दुई बालिकाको अवस्था अझै अज्ञात

अपहरणमा परेका पर्वतका दुई बालिकाको अवस्था अझै अज्ञात पत्ता लाग्न सकेको छैन। आइतबार राति अपहरित पर्वत पिपलटारी- ९ का नमूना र नविना तिवारीबारे मंगलबार साँझसम्म केही जानकारी फेला नपरेको पर्वत प्रहरीले जनाएको छ। बालिकाबारे अहिलेसम्म केही थाहा लागेन,' डिएसपी राजेन्द्रबहादुर गुरुङले भने, 'अझै गम्भीर अनुसन्धान गर्नेछौं।' प्रहरी निरीक्षक जयबहादुर सेठीको संयोजकत्वमा छानबिन समित बनाई प्रहरीले अनुसन्धान थालेको छ। एक लाख रुपैयाँ मागेर बालिका अपहरण गरेको बाबु कृष्णप्रसादले बताए पनि त्यसपछि फिरौती माग्न कसैले सम्पर्क गरेको छैन। 'यसले घटना रहस्यमय बनेको छ,' डिएसपी गुरुङले भने।सम्भावित ठाउँ र नाकामा प्रहरी परिचालित भएको छ। बालिकाका बाबुलाई पनि प्रहरीले सोधपुछ गरेको छ।

पर्वतका मानवअधिकारवादी संघसंस्थाले मंगलबार विज्ञप्ति जारी गर्दै सकुशल रिहाईको माग गरेका छन्। प्याब्सन र एनप्याब्सनले घटनाको परिणाममुखी अनुसन्धानका लागि प्रमुख जिल्ला अधिकारी वेदबहादुर कार्कीलाई ज्ञापनपत्र बुझाएका छन्।

सहपाठी अपहरण भएपछि सकुशल फर्काउन साथीले आग्रह गरेका छन्। 'मेरो साथीलाई कसले किन लगे होला,' नमुनाकी सहपाठी अस्मिता क्षेत्रीले भनिन्, 'नमुनाले कसैको केही बिगारेको छैन, जहाँ भए पनि ल्याइदेऊ।'