अर्घाखाँचीमा नाचगान गरेर तीज मनाइदै

आज हरितालिका तीज अथार्त हिन्दू नारीहरुले आफ्ना श्रीमानको लामो आयु तथा सुस्वास्थ्यको कामना गर्दै निराहार व्रतबसि नाचगानका साथ यास पर्व मनाउने दिन । यसै अवसरमा काठमाडौँको पशुपतिनाथ  सहित अर्घाखाँचीमा पनि नाचगान गरेर   तीज मनाइदै छ / अहिले अर्घाखाँचीको बलकोट , चिदिका , ठुलापोखरा , केरुंगा , सन्धिखर्क लगायत ४२ वटै गाविसमा तीज गीतहरुको कारण संगीतमय भएको छ /

भाद्र शुक्ल द्वितीयाका दिन हिजो राति दर खाएर आज तृतीयाका दिन व्रत बसी पाचमीको दिन सप्तर्षिको पूजा गरेपछि तीज सम्पन्न हुन्छ ।तीजको दर खान विशेषगरी माइतीले छोरी चेलीलाई बोलाउने र विवाहित महिलाले आफ्नो अटल सौभाग्यका लागि छोरी चेलीलाई चुरापोते प्रदान गर्नेजस्ता चलन यस पर्वमा पाइन्छ । हिन्दू महिलाको महान् धार्मिक पर्वका रुपमा लिइने तीजमा पतिको लामो आयुको कामना गरी निराहार व्रत बसेर रातभरि आफ्नो अटल सौभाग्यको प्रतीकस्वरुप दियो कलश स्थापना गरी भोलिपल्ट गोदान र पूर्णपात्र गरेर व्रत तोड्ने परम्परा छ ।

नारी स्वतन्त्रताको प्रतीकका रुपमा रहेको यस पर्वमा सौभाग्यका प्रतीक रातो सारी चुरा पोते र गरगहनामा सजिएका महिलाको आज बिहानैदेखि घुइँचो लागेको छ । धार्मिकस्थलमा महिलाको सौभाग्यका सामग्रीको किनबेच गर्नेको पनि घुइँचो छ ।

हिमालय पर्वतकी पुत्री पार्वतीले बाल्यकालदेखि महादेव स्वामी पाऊँ भनी मनमनै कामना गरिरहेको भए पनि पिता हिमालयले विष्णुलाई पार्वती कन्यादान दिन तयारी गरेको थाहा पाई सखीहरुले पार्वतीलाई हरेर कसैले नदेख्ने ठाउँमा लुकाएर राखेको र सोही स्थानमा पार्वतीले महादेव स्वामी पाऊँ भनी निर्जला व्रत बसेको हुनाले यस व्रतलाई हरितालिका तीज भन्ने गरिएको पुराणमा वर्णन छ ।

भाद्र शुक्ल पूर्णिमाको तृतीयाको दिन पार्वतीले शिवजीलाई पतिका रुपमा प्राप्त गर्न व्रत बसेपछि शिवजी पति पाएकाले तीजको व्रतको महत्व बढेको छ । सधवा नारीले पतिको आयु वृद्धिका लागि कन्याले उत्तम पुरुष पतिका रुपमा पाउन र विधवाले पतिको मुक्तिका लागि व्रत बस्ने गरेको पाइन्छ ।

तीजमा विगतका केही वर्षदेखि सरकारी र गैरसरकारीस्तरमा सामूहिकरुपमा दर खाने र चुरापोते बाँड्ने चलन पनि बढिरहेको छ । यस दिन महिलाका लागि सरकारी बिदा घोषणा गरिएको छ ।