घाँस बिक्री गरेर सामुदायिक विद्यालय

नजिकै छोराछोरीलाई पढाउनै भनेर अर्घाखाँचीका उपभोक्ताले घाँस खेती गरेर सामुदायिक विद्यालय चलाएका छन् । बाँगी-७ कुझेका गाउँलेले स्थानीय नृसिंह प्रावि घाँस बेचेर आएको पैसाले नै सञ्चालन गरेका हुन् । आठ वर्षदेखि गाउँलेले राष्ट्रिय वनलाई सामुदायिक बनाएर घाँस खेती गरेका र त्यसबाट हुने आम्दानीले विद्यालय चलाएको देउराली सामुदायिक वनका अध्यक्ष मोतीबहादुर खड्काले बताए ।

विद्यालय नजिक नहुँदा स-साना नानीहरूलाई समस्या परेपछि अभिभावकले यस्तो अभियान थालेका हुन् । सरकारले वास्ता नगरेपछि गाउँमै छोराछोरीलाई पढाउन लागेको उनीेहरू बताए । भवन निर्माणदेखि शिक्षकलाई तलब र विद्यालय खर्च घाँस बेचेर आएको पैसाले पुर्‍याएका छन् । कुझे, गोवदी पलसपाटा पोखेडाँडा लगायत ६५ परिवारका ५० भन्दा बढी

बालाबालिकाले यही विद्यालयमा पढ्छन् । शिक्षाले यस वर्षदेखि एक राहत दरबन्दी दिएको छ भने २ शिक्षकको व्यवस्था स्थानीय स्रोतबाट जुठाएको छ ।

कक्षा २ सम्म विद्यालय चलाउँदै आए पनि अन्य कक्षा भने आर्थिक अभावका कारण थप्न नसकेको खड्का बताउँछन् । 'घाँस खेती नगरेको भए विद्यालय चल्ने थिएन, शिक्षामा बारम्बार अनुरोध गर्दा चासो नदिएपछि यस्तो उपाय अपनाएका हौं,' उनले भने । उनीहरू घाँस र दाउरा बेचेर वाषिर्क ५० हजार आम्दानी गर्छन् । आफ्नो वडाभित्र पर्ने १० हजार रोपनीभन्दा बढी जग्गामा स्कुल चलाउन घाँस खेती गरेका छन् ।

घाँस बिक्री नभए आफैं काट्ने र बेचेर पैसा उठाउने गरेको व्यवस्थापन समिति अध्यक्ष भुमबहादुर महतले बताए ।

'सामुदायिक वनमा घाँस खेती नगरेको भए विद्यालय सञ्चालन गर्न सम्भव थिएन,' उनले भने, 'यसले ठूला सहयोग पुर्‍याएको छ ।'